ਰੁਪਿੰਦਰ ਗਾਂਧੀ 2 ਤੋਂ ਬਾਅਦ ਹੁਣ ‘ਡਾਕੂਆਂ ਦਾ ਮੁੰਡਾ’ ਵਿੱਚ ਵੀ ਇੱਕਠੇ ਨਜ਼ਰ ਆਉਣਗੇ ਦੇਵ ਖਰੋੜ ਤੇ ਸੁਖਦੀਪ ਸੁੱਖ

ਪੰਜਾਬੀ ਫ਼ਿਲਮ ਰੁਪਿੰਦਰ ਗਾਂਧੀ 2 ਵਿੱਚ ਰੁਪਿੰਦਰ ਗਾਂਧੀ ਅਤੇ ਉਸ ਦੇ ਭਰਾ ਮਿੰਦੀ ਦਾ ਕਿਰਦਾਰ ਨਿਭਾਉਣ ਵਾਲੇ ਅਦਾਕਾਰ ਦੇਵ ਖਰੌੜ ਤੇ ਸੁਖਦੀਪ ਸੁੱਖ ਹੁਣ ਪੰਜਾਬੀ ਫ਼ਿਲਮ ‘ਡਾਕੂਆਂ ਦਾ ਮੁੰਡਾ’ ਵਿੱਚ ਵੀ ਇੱਕਠੇ ਨਜ਼ਰ ਆਉਣਗੇ। ਰੁਪਿੰਦਰ ਗਾਂਧੀ ਵਾਂਗ ਇਸ ਫ਼ਿਲਮ ‘ਚ ਵੀ ਇਹ ਦੋਵੇਂ ਅਦਾਕਾਰ ਸਕੇ ਭਰਾ ਦੇ ਰੂਪ ‘ਚ ਨਜ਼ਰ ਆਉਣਗੇ। ਰੁਪਿੰਦਰ ਗਾਂਧੀ1 ਅਤੇ 2 ਦੇ ਪ੍ਰੋਡਿਊਸਰਾਂ ਵੱਲੋਂ ਹੀ ਇਹ ਫ਼ਿਲਮ ਬਣਾਈ ਜਾ ਰਹੀ ਹੈ। ਫ਼ਿਲਮ ਦਾ ਨਿਰਦੇਸ਼ਕ ਅਜੇ ਫ਼ਾਈਨਲ ਨਹੀਂ ਕੀਤਾ ਗਿਆ।
ਦੱਸ ਦਈਏ ਕਿ ਇਹ ਫ਼ਿਲਮ ਲੇਖਕ ਅਤੇ ਪੱਤਰਕਾਰ ਮਿੰਟੂ ਗੁਰੂਸਰੀਆ ਦੀ ਸਵੈ ਜੀਵਨੀ ‘ਡਾਕੂਆਂ ਦਾ ਮੁੰਡਾ’ ‘ਤੇ ਅਧਾਰਿਤ ਹੈ। ਮਿੰਟੂ ਦੀ ਇਹ ਸਵੈ ਜੀਵਨੀ ਵੱਡੀ ਗਿਣਤੀ ‘ਚ ਵਿਕੀ ਸੀ, ਇਸ ਨੂੰ ਹੁਣ ਤੱਕ ਲੱਖਾਂ ਲੋਕ ਪੜ• ਚੁੱਕੇ ਹਨ। ਮਿੰਟੂ ਦੀ ਜ਼ਿੰਦਗੀ ਉਹਨਾਂ ਲੱਖਾਂ, ਕਰੋੜਾਂ ਨੌਜਵਾਨਾਂ ਲਈ ਪੇਰਨਾਦਾਇਕ ਹੈ, ਜੋ ਸਮਝਦੇ ਹਨ ਕਿ ਨਸ਼ਾ ਉਹਨਾਂ ਨੂੰ ਇਕ ਕੋਹੜ ਵਾਂਗ ਚਿੰਬੜਿਆ ਹੋਇਆ ਹੈ ਤੇ ਉਹ ਕਦੇ ਵੀ ਇਸ ਤੋਂ ਛੁਟਕਾਰਾ ਨਹੀਂ ਪਾ ਸਕਦੇ। ਮਿੰਟੂ ਗੁਰੂਸਰੀਆ ਕਿਸੇ ਵੇਲੇ ਨਸ਼ਿਆਂ ‘ਚ ਗਲਤਾਨ ਸੀ, ਨਸ਼ਿਆਂ ਦੀ ਪੂਰਤੀ ਲਈ ਉਹ ਜੇਲ ਵੀ ਗਿਆ, ਨਿੱਕੀਆਂ ਮੋਟੀਆਂ ਚੋਰੀਆਂ ਵੀ ਕੀਤੀਆਂ ਤੇ ਗੁੰਡਾਗਰਦੀ ਵੀ। ਹੌਲੀ ਹੌਲੀ ਉਹ ਇਸ ਦਲਦਲ ‘ਚੋਂ ਨਿਕਲਿਆ ਤੇ ਖੁਸ਼ਹਾਲ ਜ਼ਿੰਦਗੀ ਵੱਲ ਪਰਤਿਆ। ਇਸ ਵੇਲੇ ਉਹ ਪੰਜਾਬੀ ਪੱਤਰਕਾਰੀ ‘ਚ ਵਧੀਆ ਮੁਕਾਮ ਰੱਖਦਾ ਹੈ। ਮਿੰਟੂ ਦੀ ਕਹਾਣੀ ਹਜ਼ਾਰਾਂ ਨੌਜਵਾਨਾਂ ਨੂੰ ਸੇਧ ਦਿੰਦੀ ਹੈ। ਇਹ ਕਿਤਾਬ ਪੜ• ਆਮ ਕਹੀ ਜਾਣ ਵਾਲੀ ਗੱਲ ਕਿ ‘ਨਸ਼ਾ ਕੋਹੜ’ ਨੂੰ ਝੁਠਲਾਉਂਦੀ ਹੈ। ਮਿੰਟੂ ਨੇ ਆਪਣੀ ਜ਼ਿੰਦਗੀ ਦੇ ਸਫ਼ਰ ਜ਼ਰੀਏ ਇਹ ਸਾਬਤ ਕੀਤਾ ਹੈ ਕਿ ਕੋਈ ਵੀ ਚੀਜ਼ ਇਨਸਾਨ ਦੀ ਕਮਜ਼ੋਰੀ ਨਹੀਂ ਬਣ ਸਕਦੀ। ਸਭ ਕੁਝ ਵਿਅਕਤੀ ਦੀ ਇੱਛਾ ਸ਼ਕਤੀ ‘ਤੇ ਨਿਰਭਰ ਕਰਦਾ ਹੈ।