‘ਨਿੱਕਾ ਜੈਲਦਾਰ’ ਉਹ ਪਹਿਲੀ ਪੰਜਾਬੀ ਫਿਲਮ ਹੈ ਜਿਸ ਦੀ ਤੀਜੀ ਲੜੀ ‘ਨਿੱਕਾ ਜੈਲਦਾਰ3’ ਆਉਂਦੇ ਸ਼ੁੱਕਰਵਾਰ ਯਾਨੀ 20 ਸਤੰਬਰ ਨੂੰ ਰਿਲੀਜ਼ ਹੋਣ ਜਾ ਰਹੀ ਹੈ। ਇਹ ਪਹਿਲੀ ਵਾਰ ਹੈ ਜਦੋਂ ਕਿਸੇ ਫ਼ਿਲਮ ਦਾ ਤੀਜਾ ਸੀਕੁਅਲ ਬਣ ਰਿਹਾ ਹੈ। ਨਿਰਮਾਤਾ ਅਮਨੀਤ ਸ਼ੇਰ ਕਾਕੂ, ਰਵਨੀਤ ਸ਼ੇਰ ਕਾਕੂ ਤੇ ਟੀਮ ਵੱਲੋਂ ‘ਵਾਈਕੌਮ 18 ਸਟੂਡੀਓ’ ਨਾਲ ਮਿਲਕੇ ਬਣਾਈ ਗਈ ਇਸ ਫਿਲਮ ਨੂੰ ਸਿਮਰਜੀਤ ਸਿੰਘ ਨੇ ਨਿਰਦੇਸ਼ਤ ਕੀਤਾ ਹੈ। ਸਿਮਰਜੀਤ ਸਿੰਘ ਪਹਿਲਾ ਨਿਰਦੇਸ਼ਕ ਬਣ ਗਿਆ ਹੈ ਜਿਸ ਦੀ ਕਿਸੇ ਫ਼ਿਲਮ ਦਾ ਤੀਜਾ ਸੀਕੁਅਲ ਰਿਲੀਜ਼ ਹੋਣ ਜਾ ਰਿਹਾ ਹੈ। ਜਗਦੀਪ ਸਿੰਘ ਸਿੱਧੂ ਤੇ ਗੁਰਪ੍ਰੀਤ ਸਿੰਘ ਪਲਹੇੜੀ ਦੀ ਲਿਖੀ ਇਸ ਫ਼ਿਲਮ ਵਿੱਚ ਐਮੀ ਵਿਰਕ ਨੇ ਮੁੱਖ ਭੂਮਿਕਾ ਨਿਭਾਈ ਹੈ। ਨਿਰਦੇਸ਼ਕ ਸਿਮਰਜੀਤ ਸਿੰਘ ਅਤੇ ਐਮੀ ਵਿਰਕ ਦੀ ਜੋੜੀ ਦੀ ਇਹ ਪੰਜਵੀਂ ਫ਼ਿਲਮ ਹੋਵੇਗੀ।
ਇਸ ਸੀਕੁਅਲ ਵਿੱਚ ਇਸ ਵਾਰ ਐਮੀ ਵਿਰਕ ਨਾਲ ਸੋਨਮ ਬਾਜਵਾ ਦੀ ਥਾਂ ਵਾਮਿਕਾ ਗੱਬੀ ਨਜ਼ਰ ਆਵੇਗੀ। ਵਾਮਿਕਾ ਇਸ ਤੋਂ ਪਹਿਲਾਂ ‘ਨਿੱਕਾ ਜ਼ੈਲਦਾਰ 2’ ਵਿੱਚ ਵੀ ਐਮੀ ਨਾਲ ਕੰਮ ਕਰ ਚੁੱਕੀ ਹੈ। ਇਸ ਤੋਂ ਇਲਾਵਾ ਫ਼ਿਲਮ ‘ਚ ਕੰਮ ਕਰਨ ਵਾਲੇ ਕਲਾਕਾਰ ਵੀ ਲਗਭਗ ਪਹਿਲੇ ਸੀਕੁਅਲਸ ਵਾਲੇ ਹੀ ਹਨ। ਇਸ ਫ਼ਿਲਮ ਜ਼ਰੀਏ ਦੇਸ਼ ਦੀ ਨਾਮਵਰ ਫ਼ਿਲਮ ਕੰਪਨੀ ‘ਵਾਈਕੌਮ 18 ਮੋਸ਼ਨ ਪਿਕਚਰਸ’ ਵੀ ਪੰਜਾਬੀ ਸਿਨੇਮੇ ਨਾਲ ਜੁੜਨ ਜਾ ਰਹੀ ਹੈ। ਪੰਜਾਬੀ ਸਿਨੇਮੇ ਦੇ ਮੋਹਰੀ ਫ਼ਿਲਮ ਨਿਰਦੇਸ਼ਕਾਂ ‘ਚ ਸ਼ਾਮਲ ਅਤੇ ‘ਅੰਗਰੇਜ਼’ ਵਰਗੀ ਸ਼ਾਹਕਾਰ ਫ਼ਿਲਮ ਬਣਾਕੇ ਪੰਜਾਬੀ ਸਿਨੇਮੇ ‘ਚ ਇਤਿਹਾਸ ਰਚਣ ਵਾਲੇ ਨਿਰਦੇਸ਼ਕ ਸਿਮਰਜੀਤ ਸਿੰਘ ਦੀ ਇਹ ਬਤੌਰ ਨਿਰਦੇਸ਼ਕ ਇਹ ਬਾਰਵੀਂ ਫ਼ਿਲਮ ਹੋਵੇਗੀ। ਨਿਰਦੇਸ਼ਕ ਸਿਮਰਜੀਤ ਸਿੰਘ ਤੇ ਨਿਰਮਾਤਾ ਅਮਨੀਤ ਸ਼ੇਰ ਕਾਕੂ ਦੀ ਜੋੜੀ ਵੱਲੋਂ ਸਾਲ 2016 ਵਿੱਚ ਐਮੀ ਵਿਰਕ ਤੇ ਸੋਨਮ ਬਾਜਵਾ ਨੂੰ ਲੈ ਕੇ ‘ਨਿੱਕਾ ਜ਼ੈਲਦਾਰ’ ਬਣਾਈ ਗਈ ਸੀ। ਇਸ ਫ਼ਿਲਮ ਦੀ ਆਪਾਰ ਸਫ਼ਲਤਾ ਤੋਂ ਬਾਅਦ ਅਗਲੇ ਸਾਲ 2017 ਵਿੱਚ ‘ਨਿੱਕਾ ਜ਼ੈਲਦਾਰ 2’ ਰਿਲੀਜ਼ ਕੀਤੀ ਗਈ ਅਤੇ ਹੁਣ ਇਸ ਦਾ ਅਗਲਾ ਸੀਕੁਅਲ ‘ਨਿੱਕਾ ਜ਼ੈਲਦਾਰ 3’ ਆ ਰਿਹਾ ਹੈ। ਹਿੰਦੀ ਸਿਨੇਮੇ ‘ਚ ਕ੍ਰਿਸ਼, ਗੋਲਮਾਲ, ਧੂਮ ਵਰਗੀਆਂ ਕੁਝ ਚੋਣਵੀਆਂ ਫ਼ਿਲਮਾਂ ਹੀ ਤੀਜੇ ਸੀਕੁਅਲ ਤੱਕ ਪੁੱਜੀਆਂ ਹਨ, ਪਰ ਪੰਜਾਬੀ ਦੀ ਇਹ ਰੁਤਬਾ ਹਾਸਲ ਕਰਨ ਵਾਲੀ ਇਹ ਪਹਿਲੀ ਫ਼ਿਲਮ ਹੈ, ਜਿਸ ਨੇ ਹਿੰਦੀ ਸਿਨੇਮੇ ਦੀ ਇਸ ਸੀਕਅੁਲ ਲੜੀ ‘ਚ ਖੁਦ ਨੂੰ ਸ਼ਾਮਲ ਕਰ ਲਿਆ ਹੈ। ਇਸ ਫ਼ਿਲਮ ਦੇ ਟ੍ਰੇਲਰ ਨੂੰ ਮਿਲੀ ਆਪਾਰ ਸਫ਼ਲਤਾ ਦੱਸ ਰਹੀ ਹੈ ਕਿ ਇਹ ਫ਼ਿਲਮ ਵੀ ਆਪਣੀਆਂ ਪਹਿਲੀਆਂ ਕੜੀਆਂ ਵਾਂਗ ਆਪਾਰ ਸਫ਼ਲਤਾ ਹਾਸਲ ਕਰੇਗੀ।
